Sion duc Indios

Sion duc Indios

 

I dejastres provoché te nosc raion da la “tempesta Vaia” l’é nia en confront con chel che enstadì sozet te l’Amazonia. Doi evenc catastrofai, desferenc per proporzion, ma a vèlch vida leé un co l’auter: fenomen “naturèl” l prum (ma demò a prum veder), chel che à dessatà l bosch alpin su na spersa mai veduda dant, da la Ciarnia a l’Adesc; fenomen caujà diretamenter da la man de l’om chel auter, chel che é dò a fèr jir en cender la maor selva pluviala del pianet. Epura duc e doi l’é l frut envelenà de la vercia avidità de l’Om.

Duc enten, de fat, che l svilup zenza control de la tecnologìa, l progress economich e la ziviltà del consum, sostegnui da na politica biot de rapina envers la natura, a dan de la maor pèrt de la popolazions de chesta tera, é dò a mudèr per semper l’equiliber climatich del pianet, con gran devastazions che la furia di elemenc portarà da spes ence te nesc paìjes. Se dapò chest sie dassen “progress” e “ziviltà” no se stentarà a entener, se jon inant a chesta vida.

L’é na ciadena zenza fin che condanarà l’Umanità a l’autodestruzion, e i potenc somea no ge badèr, cruzié demò del PIL e de la concorenza. “Chel che l’é dò a sozeder te Brasil e utró – ne scrif da la Germania Giorgio Jellici – l’é l scomenz de la fin. L destin de l’Homo Sapiens é segnà: l fech che Prometeo à robà ai dees de l’Olimp per ge l donèr ai omegn, l’é dò a ne brujèr la cèsa”.

Sun chest Greta Thunberg à dret rejon, e sia fegura de toseta menuda e forta fèsc cobia con chela del bezat indio che slèria si picoi brac desche per defener chel gran èlber de “sia” foresta.

I joegn “millenials” da anchecondì l’é dassen la generazion che riscia de vegnir derobèda del davegnir e de padir per pruma i efec de chest prozess suizida; e d’autra pèrt l’é ence la generazion che per pruma à l derit de uzèr la ousc e de se bater contra chest prozess, per fèr madurèr na neva coscienza a livel global. Ma duc podon fèr zeche, te nosc picol, dant da dut mudan nosc “stel de vita”, descheche Jellici à scrit enstadì sui sfoes.

Salvon l’Amazonia da la deforestazion, salvon l’Africa da la desertificazion! Se no mudon endrez en prescia, no joarà nia baudièr che seghita a ruèr barcons de neigres sun noscia costes, no joarà nia fèr sù mures sui confins. L mudament climatich l’é oramai na emergenza globala: negugn sarà più al segur, nience te noscia valèdes da mont. I èlbres rebalté a miiares i é ló ogne dì a ne l recordèr.

Per chest ence nos ladins #sionducIndios!

Fabio del goti
Comitat provisorie per na neva UAL

Pubblicazione